આણાં આવ્યાં રે સૈયર!

ઝાડ ઉપર ઝૂમખડું, ઝૂમખડું લૂમેઝૂમે

આણાં આવ્યાં રે સૈયર!

તોરણ ગૂંથ્યું ફૂલ, ફૂલમાં ગૂંથ્યું ગમતું નામ

ઉંબર વચ્ચે ઊભી રહી હું ભૂલી સઘળું કામ.

આજ બારણે લાભ-શુભની વેલ્યું લૂમેઝૂમે

આણાં આવ્યાં રે સૈયર!

અચરજ જેવું ટાણું ઘરમાં હરતુ ફરતું મ્હાલે

દર્પણમાંથી ફૂટી નીકળતું કોઈ અચાનક ઝાલે!

છાતી ઉપર અનરાધારે આખ્ખું આભ ઝઝૂમે

આણાં આવ્યાં રે સૈયર!

દાદાજીના આંબલિયેથી ખરશે કૂણું પાન

પિયરથી સાસરના રસ્તે ખોઈ નાખશું ભાન

ચૉળી–ચણિયાળી ટચૂકડી છબિ આંખમાં ઘૂમે

આણાં આવ્યાં રે સૈયર!

Aana Aavya Re Saiyar