wegila wahanmanthi bahar nirakhti aankh jhapatabher lasarkaman - Free-verse | RekhtaGujarati

રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો
search search
લૉગ-ઇન

વેગીલા વાહનમાંથી બહાર નીરખતી આંખ ઝપાટાભેર લસરકામાં

wegila wahanmanthi bahar nirakhti aankh jhapatabher lasarkaman

દિલીપ ઝવેરી દિલીપ ઝવેરી
વેગીલા વાહનમાંથી બહાર નીરખતી આંખ ઝપાટાભેર લસરકામાં
દિલીપ ઝવેરી

વેગીલા વાહનમાંથી બહાર નીરખતી આંખ ઝપાટાભેર લસરકામાં

જોયેલું છોડીને જાય

એ રીતે અક્ષરો વાંચનારને

કવિતા બાંય ઝાલીને ઉતારી દે

અને એક એક કરીને દેખાડે

આકાશનો અ બારીને બ રસ્તાનો ર

દુકાનના પાટિયા પરથી ઝંપલાવી

બરણીઓના કાચ પછવાડેની રંગીનીઓને અડપલાં કરતો તડકો

દોરી કૂદતી ફરાકફૂલી છોકરી

સુકાતાં કપડાં પાછળથી લપઝપ કજિયે ચડ્યા બાળકના ગાલ પરનો રેલો

સામે માલ ખડકીને પોરો ખાતા મજૂરના કપાળ પરનો પરસેવો

ખાબોચિયામાં સરોવર

ફૂટપાથની વચોવચ સળવળતા તરણાની લીલાશમાં ગાઢ વનનો શ્વાસ

ઉઘાડી ગટરમાંથી ઊભરાતી સદીઓથી સડ્યાં માસૂમ મડાંની વાસ

સિનેમાના ઈશ્કેટાટ પોસ્ટરના બાકોરામાં ચાંચોચાંચ કબૂતર

રેંકડીના ચકરાતા ચાકમાંથી વિસ્તરતાં નક્ષત્રનિહારિકાઓ

થંભેલા વાહનના કાચમાં ડોકિયું કરતાં

અચાનક પોતાનો અદીઠો ચહેરો

જેનું જીવતું નામ

કાનમાં વગર સાદે કહી

અનેક રીતે બોલાતા પારદર્શક અક્ષરોમાં લખી

ભૂંસી પડઘા પાડી

બાંય ઝાલીને પોતાની જોડાજોડ

સમયની પેલી પાર ઝપાટાભેર લસરાવી જાય

તે કાગળ પરની કાળી શાહીમાં

નિશ્ચલ સમાઈ ગયેલી કવિતા

સ્રોત

  • પુસ્તક : કવિતા વિશે કવિતા (પૃષ્ઠ ક્રમાંક 28)
  • સર્જક : દિલીપ ઝવેરી
  • પ્રકાશક : બીજલ પ્રકાશન
  • વર્ષ : 2016