રેખ્તા
હિન્દવી
સૂફીનામા
રાજસ્થાની
ટાંકી
tanki
ઉદયન ઠક્કર
ઉદયન ઠક્કર
સહેજ મોટી હતે તો સેલ્લારા લેતે મગરમચ્છ
સહેજ નાની હતે
તો મોઢે માંડત
*
સંભળાય
પેલી તરફ
પાણીને પડછાયે પલળતાં પારેવાંનું ગુટર્ગું
આ તરફ
પરપોટાની બુડ બુડ
શેવાળનો શ્વાસોચ્છ્વાસ
જળનું હાસ્ય
ખળખળાટ
*
આષાઢમાં
પાણી અને પાણી વચ્ચે
પાતળું પડ પહેરીને ઊભા રહેવું
કેમ ગમતું હશે આને?
*
આ વાદળી હતે
તો નળની નહીં
મોરલાની ચાંપે વરસતી હતે
*
ચકલી ચાંચ ઝબકોળે ટાંકીમાં...
આંદોલાય અચ્છોદ સરોવર
ડોલે દેવદાર
વાયુ વાંસળી વજાડે
ખિસકોલો શીંગ ધરે ફોલીને
ખિસકોલીને
વાદળની છાયા સરે
હેમકૂટ પર્વત પર હળવેકથી
ઇન્દ્રનો રથ ઊતરે
સ્રોત
- પુસ્તક : રાવણહથ્થો (પૃષ્ઠ ક્રમાંક 54)
- સર્જક : ઉદયન ઠક્કર
- પ્રકાશક : આર. આર. શેઠની કંપની
- વર્ષ : 2022