રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
એક અશક્ય વાત
ek ashakya wat
વિપિન પરીખ
વિપિન પરીખ
એક દિવસ
આપણે આ શહેરને છોડી ચાલ્યા જશું.
ગામમાં આપણું એક ઘર હશે.
ફૂકડાના સ્વરે ચિરાઈ જશે અંધકારનો પટ.
તેજનાં કિરણ પગલાં મૂકશે આંગણામાં હળવે હળવે.
વાડામાં ભાંભરતી ગાયોનાં નામ હશે : નીલમણિ અને નંદિની.
તું
તુલસીના ક્યારામાં જળ સીંચી
સૌભાગ્યને ઉજ્જવળ કરતી હશે સવારે.
બહાર
આપણું બાળક ગેલ કરતું હશે
બિલાડીનાં કાળાંધોળાં બચ્ચાં સાથે.
રાત્રે
ચંદ્ર એનું ચંદન રેલી છુપાઈ જશે વાદળપૂંઠે
અને
આંગણામાં ઊભેલો ગુલમહોર
સમીરને
આપણી વાતો કહેતાં કહેતાં લાલ થતો હશે.
સ્રોત
- પુસ્તક : આશંકા (પૃષ્ઠ ક્રમાંક 42)
- સર્જક : વિપિન પરીખ
- પ્રકાશક : વોરા ઍન્ડ કંપની
- વર્ષ : 1975