આ શહેર

આ શહેર

આકાશને

ટચલી આંગળીએ

ઊંચકી ઊંચકી

થાકી ગયેલું શહેર

રાત્રે પણ સૂઈ શકતું નથી,

તરફડે છે

કોઈક પશુની આંખની જેમ.

શહેરને મન

નથી રહ્યો ભેદ

સવાર કે સાંજનો.

મશીનમાં બનેલાં એકસરખાં

ખોખાંની પેઠે

ખડકાયે જાય છે સવાર સાંજના આકારો.

ગલીઓમાં ઘૂમ્યા કરે છે

ચિંતાના કૃત્રિમ ઉપગ્રહોના પડછાયા

અને દોડ્યા કરે છે

આકારહીન અવાજો

પાગલખાનામાંથી છૂટેલા શબ્દની જેમ

અથડાયા કરે છે તમને અને

પોલી કરી નાખે છે

તમારી ચામડીને

હાશ,

ત્યાં અયાનક

મિત્રના પરિચિત અવાજ

ટપકી પડે છે

દરિયા વચ્ચેના ટાપુની જેમ.

aa shaher