સરકાર
sarkaar
ચંદ્રકાંત બક્ષી
Chandrakant Bakshi
ચંદ્રકાંત બક્ષી
Chandrakant Bakshi
સરકારને કરોડ મોઢાં હોય છે
પણ એક આત્મા હોતો નથી
સરકાર અવાજની માલિક છે
અને માલિકનો અવાજ છે
સરકાર વિચારો કરાવી શકે છે
સરકાર લેખકને લખાવી શકે છે
જાદુગરને રડાવી શકે છે
ચિત્રકારને ચીતરાવી શકે છે
ગાયકને ગવડાવી શકે છે
કલાકારને કલા કરાવી શકે છે
એક હાથે તાળી પડાવી શકે છે
રવિવારને સોમવાર બનાવી શકે છે
નવી પેઢીને જૂની કરી શકે છે
જૂનીને પૈસાદાર બનાવી શકે છે
પૈસા છાપી શકે છે, ઘાસ ઉગાડી શકે છે
વીજળી વેચી શકે છે, ઇતિહાસ દાટી શકે છે
અર્થને તંત્ર અને તંત્રને અર્થ આપી શકે છે
સરકારોની ભાગીદારીમાં આ પૃથ્વી ફરે છે
સમય ફરે છે, માણસ ફરે છે
યંત્ર ફરે છે, મંત્ર ફરે છે
પણ એક દિવસ,
ગરીબની આંખ ફરે છે, અને-
સરકાર ફરે છે...
સ્રોત
- પુસ્તક : કવિતા : ઑગસ્ટ ૧૯૭૭ (પૃષ્ઠ ક્રમાંક 1)
- સંપાદક : સુરેશ દલાલ
- પ્રકાશક : જન્મભૂમિ પ્રકાશન, મુંબઈ
