રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

ધર્મ

ભરત વિંઝુડા

ધર્મ

ભરત વિંઝુડા

Roman

૧

કોઈપણ માહિતી ફોર્મમાં

ધર્મ

સામેની ખાલી જગ્યામાં

અધર્મી

લખી શકાતું નથી, અને મારો

સ્વધર્મ

અસ્તિત્વમાં આવી શકતો નથી

ર

આ ધર્મ

મારા

પિતાજીનો છે

એટલે

મારો છે!

૩

તું ધર્મનું પુસ્તક વાંચે છે અને

હું

એકવેરિયમમાં તરતી માછલી જોઉં છું

૪

બ્લ્યુ ફિલ્મ જેવા

ધર્મના નક્શાઓ જોઈ જોઈને

કાશ્મીરથી કન્યાકુમારી સુધી

જતી

રેખાના વળાંકો ભૂલાઈ ગયા છે

પ્રિયે!

પ

ફાંસીના માચડે ચડાવવા

લઈ જવાતો કેદી હોઉં એમ

ઘેટાંઓના સળિયાની

હરતી-ફરતી જેલ વચ્ચે

ચાલ્યો જાઉં છું

અને

સામે પ્રચંડ ઊંડી–ખીણ જોઉં છું

હું થંભી શકતો નથી

મારી દિશા ફંટાઈ શકતી નથી

હું ચિત્કારી શકું છું માત્ર,

આ મૃત્યુ મને મંજૂર નથી.

આ મૃત્યુ મને મંજૂર નથી

અને આ મૃત્યુ મને છોડવાનું પણ નથી

હવે

જીવી લેવાની બાકી બચી ગયેલી ક્ષણોમાં

કોઈ પણ ધર્મમાં ન આવતું હોય

એવું ઈશ્વરનું નામ હું રટી લેવા માગું છું.

સ્રોત

પુસ્તક : દલિત કવિતા સંચય (પૃષ્ઠ ક્રમાંક 1)
સંપાદક : ગણપત પરમાર, મનીષી જાની
પ્રકાશક : દલિત સાહિત્ય સંઘ
વર્ષ : 1981