રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
જયંતિ મકવાણા
હું કેશવ ગાંડા ભંગી
મારા અન્નદાતા A.M.C. બ્રાન્ડના વાદળી પોશાકમાં સજ્જ.
આશરમ રોડ એ તો મારી બાપુકી પેઢીનો ચીલો
અને ફૂટપાથની સોડમાં હોડીની જેમ લાંગરેલી,
કાટિયા કલરની–કેશવ ગાંડા નામવાળી–વ્હીલબરો!
એ તો પિતાજીની ઈમ્પોર્ટેડ એમ્બેસેડોર!
(એની કીચેઈન મારા ગળામાં જ તો?)
આ ઝાડુ અમારું જીવનસાથી–કલ્પવૃક્ષ.
અમારો બ્રેકફાસ્ટ–કીટલીની અડધી.
શહેરની ગટરોને પાતાળલોક વૈતરણી ગણી
લાંચ આપી છે મુકાદમોને.
મેનહોલનું ઢાંકણ ઉધાડતાં ધસી આવતી
સહસ્ર સડ્યાં ભદ્ર શબોની સુ-વાસ.
સવલીની માએ ઉપાડેલા મળનું ડબલું.
ને દૂર નાગો ફરતો મારી પેઢીનો વારસદાર
બસ એ જ અમારે માટે “અનામત”?
હોટલની પછીતે અલાયદો મુકાયેલો મારો
બાદશાહી નાકું તૂટેલ કપ!
અને અખબારનાં પાનાંઓ પર
ભંગી કષ્ટમુક્તિની મસ મોટી જાહેરાતો...
મારો ભીરુતાને પડકારે છે...
હું કેશવ ગાંડા ભંગી.
સ્રોત
- પુસ્તક : દલિત કવિતા સંચય (પૃષ્ઠ ક્રમાંક 148)
- સંપાદક : ગણપત પરમાર, મનીષી જાની
- પ્રકાશક : દલિત સાહિત્ય સંઘ
- વર્ષ : 1981