રેખ્તા
હિન્દવી
સૂફીનામા
રાજસ્થાની
કિલ્લો તૂટે
ને વિફરેલું સૈન્ય ધસે
કે ફણા પછાડતો દરમાંથી સાપ નીકળે એમ
તેજ તડિત તોખાર તણખ તલવાર
પવન
ફૂંકાવા લાગ્યો
ઘરની છત
ભડકેલા સાંઢના શિંગે ભરાયેલી
ક્યાંક
આછી તિરાડોમાંથી ભાલા ઊડે...
ભીંતોમાં ભોંયતળિયે
ખળકતાં જળનો અવાજ
વહી જતાં ખળખળ જળનો અવાજ
વેગભર વહી જતાં ઊછળતાં ખળખળ જળ
ભીંતો ઘૂઘવતી જળભેખડો જાણે
ને ઘર
પ્રબલ પ્રવેગે પછડાતા લોઢ પર
હોડકું
વીંઝાતા
પ્રચંડ પડછંદ જળપર્વતો તૂટે
ભીંતો પર
અંધારામાં ઊછળતાં ઘેટાં જેવાં જળ વહે
ચોમેરે
ઘનઘેરાં જળની ખુલ્લી વિકરાળ મોંફાડોમાં
આઘે આઘેના તારા ટમકે
ક્યાંક
પથ્થરો વચ્ચે વડવાનલ પેટે
પ્રગટે ઝબકે રત્નભંડાર
ખળકતાં બેબાકળાં જળ
હમણાં ભોંય ફોડી ઊછળશે છત ભેદી ઊડશે
હમણાં
ભીંતો ખડકાળ કાળાં જળ વહેશે
હમણાં
અંધકારનાં નીરવ પેટાળો તળે
સઘળું
સઘળું ગરકી જશે...
સ્રોત
- પુસ્તક : ઉત્તરાયણ (પૃષ્ઠ ક્રમાંક 166)
- સંપાદક : દીપક મહેતા
- પ્રકાશક : નેશનલ બુક ટ્રસ્ટ, ઇન્ડિયા
- વર્ષ : 2008