રેખ્તા
હિન્દવી
સૂફીનામા
રાજસ્થાની
વિશ્વ મારું
wishw marun
મણિલાલ દેસાઈ
મણિલાલ દેસાઈ
આ સ્વપ્નની ભૂમિ ઉપર પગલાં સુધાનાં,
આ આભમાં બાંધ્યાં બધાં ગાંધર્વ નગરો.
આ સ્વર્ગથી આવી ભૂમિ પર
આખડી, વહેતી નદી.
આ શબ્દ મારા
માતરિશ્વા અર્થના એકાન્તના,
આ હસ્ત મારા
કેટલા યે કર્ણ ને અર્જુનના બળથી ભરેલા.
કૈં કેટલા યે રાવણોના ગર્વ
મારા શ્વાસમાં વ્હેતો.
આ વિશ્વ મારું
બાર સૂરજથી ય તે શોષાય ના!
આ વિશ્વ મારું
સાત સાગરના જલે જો જાય ડૂબી...
હું વરાહી દંતમાં ગ્રહી
બ્હાર આણું.
સ્રોત
- પુસ્તક : રાનેરી (પૃષ્ઠ ક્રમાંક 88)
- સર્જક : મણિલાલ દેસાઈ
- પ્રકાશક : ગૂર્જર ગ્રંથરત્ન કાર્યાલય
- વર્ષ : 1987
- આવૃત્તિ : 2