આ મધ્યાહ્ને મારી છાયાને છેતરીને

આ મધ્યાહ્ને મારી છાયાને છેતરીને

હમણાં જ હું ભાગી છૂટ્યો છું.

પણ નમતે પહોરે મારી છાયા

એની કાયા લંબાવી લંબાવીને મને શોધશે.

ત્યારે આંસુ ખેરવીને ચાડી ખાશો નહીં.

હૃદયનો પથરો અન્ધકારના પાતાળમાં

બીકના માર્યા ગબડાવી દેશો નહીં.

બે નિસાસાનાં ચકમક અને ગજવેલ ઘસીને

તણખાની આંખે મને શોધશો નહીં.

કૂવામાં ઊગી નીકળેલા પીપળાનાં મૂળ જેવી આંગળીઓને

શૂન્ય ઉચ્છ્વાસનું ગળું ટૂંપવા ભીડશો નહીં.

શિરાઓની બોડમાંથી અગ્નિફાળ ભરતી વાસનાઓને

મારી પાછળ દોડાવશો નહીં.

મારું પગેરું કાઢવાને આંધળી સ્મૃતિઓને રઝળાવશો નહીં.

દુષ્કાળની નદીના રેતાળ પટ જેવા લલાટે

કંકુની ચણોઠી વાવશો નહીં.

બે આંખનાં ઝેરી પડીકાં ઘોળી ઘોળીને

ચાંદાસૂરજને પિવડાવશો નહીં.

aa madhyahne mari chhayane chhetrine