રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

મને માણસ માટે ખરેખર માન છે

નીતિન મહેતા

મને માણસ માટે ખરેખર માન છે

નીતિન મહેતા

Roman

મને તો સાચે જ એ માણસો માટે માન છે

કે જે અંધારામાં અથડાઈ પડે છે

કે ટ્રેનમાં ઊંઘી જાય છે ને

ભળતે જ સ્ટેશને પહોંચી જાય છે

મને માણસ માટે માન છે કે હજી

તેને પાંખો ફૂટી નથી

હજી તેને અસ્થમા જેવા રોગ થાય છે

તે ગુસ્સામાં બીજાને મારી શકે છે

ને વારંવાર પોતાની વાત પણ કરી શકે છે

મને માણસ માટે હજી માન છે

ફર્નિચરની વાત કરતાં તેનું મોઢું પડી જાય છે

એક સાંજે તે કોઈની રાહ જુએ છે

આત્મહત્યાના વિચારો કરે છે

ચાવીઓ ખોઈ નાખે છે

ભૂતકાળને ખોદ્યા કરે છે

મને માણસ માટે ખરેખર માન છે

તે હજી ઝઘડી શકે છે

મૂંઝાય છે, રઘવાયો થાય છે,

એકબીજામાં શંકાનો વિશ્વાસ જગાવી શકે છે

મને ખરેખર માણસ માટે

માન છે ને તે મને ગમે છે.

સ્રોત

પુસ્તક : આપણી કવિતાસમૃદ્ધિ (ઉત્તરાર્ધ) (પૃષ્ઠ ક્રમાંક 395)
સંપાદક : ચન્દ્રકાન્ત ટોપીવાળા
પ્રકાશક : ગુજરાતી સાહિત્ય પરિષદ
વર્ષ : 2004