ખિસ્સાને ખૂણે ઘટેલી ઘટના

ખિસ્સામાં એક વરિયાળીનો દાણો

કંઈ દિવસથી પડી રહેલો

એકલખૂણે સડી રહેલો

મમળાવ્યો મારી આંગળીઓએ

ખિસ્સામાં એક વરિયાળીનો દાણો.

અડે ટેરવે જરીક ત્યાં તો

જીભ લગી એ ગંઘફૂરાટે ચઢે

આંગળીએથી ચડતો ચડતો ચડતો ચડતો

એ મનની જોડે હળે

વરિયાળીનો દાણો.

ક્યારેક કોઈ સુખ ભોગવતાં

કદીકની કોઈ પળ ચગળતાં

રહી ગયો એ છેટો,

ભેગો ભેગો દળાઈ જાત એ

ભેગો ભેગો ચળાઈ જાત એ

રહી ગયો એ જરીક સુખની બહાર

જોઉં તો કોઈ નથી નિશાની એણે રાખી

ચોખ્ખોચણાક જરીક જેટલો નકરો નકરો દાણો

એ તો વરિયાળીના દાણા જેવો દાણો

મમળાવે મારી આંગળીઓને

આખે-આખો ઝાલી ગંધમાં

ચુપચાપ એ ક્યાંય ફંગોળે મને......

khissane khune ghateli ghatna