રેખ્તા
હિન્દવી
સૂફીનામા
રાજસ્થાની
વૃક્ષ
wriksh
રમેશ આચાર્ય
રમેશ આચાર્ય
વાહનો આવતાં જોઈ
વૃક્ષોએ વનમાં
રસ્તો કરી આપ્યો
પણ હવે એ
આઘાં ખસી શકશે નહિ,
સડકની બંને બાજુએ
ખાઈ ખોદેલી છે.
*
વૃક્ષને છેદો તો
એમાંથી નીકળે વૃક્ષ,
વૃક્ષને કાપો ને
રોપાઈ જાય વૃક્ષ;
વૃક્ષને બાળો ત્યાં
ઊગી જાય વૃક્ષ.
*
વૃક્ષ,
હું અહીં ઊભો છું.
તું કંટાળી ગયું હોય તો
પેલી ખિસકોલીને
મારા શરીર પર
સંતાકૂકડી રમવાનું કહે.
*
હું બેઠો છું
વૃક્ષનું ખોડીબારું પલાણીને,
ને વૃક્ષ તો
ઊંચે વધતું જાય છે.
સ્રોત
- પુસ્તક : કાવ્યસંચય - 3 (પૃષ્ઠ ક્રમાંક 181)
- સંપાદક : રમણલાલ જોશી, જયન્ત પાઠક
- પ્રકાશક : ગુજરાતી સાહિત્ય પરિષદ
- વર્ષ : 1981