રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

પૂજા

પ્રીતમ લખલાણી

પૂજા

પ્રીતમ લખલાણી

Roman

શ્રાવણ મહિનાના

સોમવારે તો ઠીક

હું તો વારતહેવારે પણ

દેવ દર્શને જવાનું ટાળું છું

પણ કોઈ ઢળતી સાંજે

આંગણાના

મેપલ વૃક્ષ તળે

ચકલીને

ધૂળમાં નહાતી જોઉં છું ત્યારે

એકાએક

મારું મન

ભર ચોમાસે ગામના છેવાડે

આવેલ શિવ દેરીના

તળાવમાં

બાળ ભેરુ સાથે

મારેલા ધુબાકા અને

લીલા ખેતર વચ્ચે

ખરે બપોરે

શેઢા સંગે હડીયાપટ્ટી કરતાં

પતંગિયા સાથે

રમેલ સંતાકૂકડીની યાદે

મન ભરાઇ આવે છે ત્યારે

આંખે આવેલ

આંસુ લૂછતાં

અમેરિકા આવવા

ગામથી નીકળ્યો ત્યારે

ભાથાના ડબ્બા સાથે

બાએ આપેલ પાદરની

મુઠ્ઠી એક ધૂળમાંથી

ચપટીક ભરી

કપાળે

તિલક કરી લઉં છું!

સ્રોત

પુસ્તક : ગુજરાત દીપોત્સવી અંક (પૃષ્ઠ ક્રમાંક 34)
સંપાદક : પુલક ત્રિવેદી
પ્રકાશક : માહિતી નિયામકની કચેરી, ગુજરાત રાજ્ય, ગાંધીનગર
વર્ષ : 2018