રેખ્તા
હિન્દવી
સૂફીનામા
રાજસ્થાની
મત્સ્યાવતાર
matsyawatar
પ્રતિષ્ઠા પંડ્યા
પ્રતિષ્ઠા પંડ્યા
ડ્રૉઈંગરૂમના
લેધરના સોફાની બાજુમાં
આરસની ટિપૉઈ પર
કાચના પારદર્શક ઘડામાં
રંગરંગીન પથરાઓ
ને અદૃશ્ય પાણીની વચમાં
મૂકી તેં મને
માપી માપીને ફરવા
પણ મારા મનમાં વિસ્તરતી ક્ષિતિજોને
નાનો પડવા લાગ્યો તારો ઘડો
ને એક દિવસ હું ચાલી નીકળી
તોડીને ઘડો
તરછોડીને જળાશયો
મૂકી વહેતી બાંધેલી નદીઓ
ભૂલીને મનુની હોડી
હું ચાલી નીકળી
બની એક વિશાળકાય માછલી
ધસમસતી
બાંધીને શિંગ પરે
મારી આખેઆખી દુનિયા
વીણી વીણીને લીધી સાથે
કાચાં સપનાંની એક એક ક્યારી
તૂટીફૂટી જાળ સંબંધોની
ક્ષણો પાતળી, ઝીણી, સુંવાળી
ઇચ્છાઓ ધગધગતી, પ્રલયકારી
હિંમતનો પહાડ મલય લઈ ભારી
વહું હું
માછલી વિશાળકાય!
સ્રોત
- પુસ્તક : ળળળ... (પૃષ્ઠ ક્રમાંક 126)
- સર્જક : પ્રતિષ્ઠા પંડ્યા
- પ્રકાશક : નવજીવન સાંપ્રત
- વર્ષ : 2019