હું ડૂબું છું

હું ડૂબું છું

હું ડૂબું છું

ઉન્નિદ્ર નયનોની સ્નેહહીન શુષ્ક ઉષરતાના પાતાળમાં,

નિઃશ્વાસથી ધસી પડેલી શબ્દોની ભેખડોના ભંગારમાં;

ખરી જતાં ગુલાબોની પાંખડીઓમાંથી રઝળી પડેલા અનાથ અવકાશમાં,

ફળના ગર્ભમાં રહેલા કીટની નિઃસંગ બુભુક્ષાના અન્ધ કલણમાં;

ઘુવડે નસ્તર મૂકીને ફોડેલા રાત્રિના પુષ્ટ વ્રણના ઉષ્ણ દ્રવમાં;

હજાર ગરુડોની પ્રસારેલી પાંખોનાં ઊછળતાં મોજાંમાં

ક્ષિતિજના વલયની અશ્રુભંગુર ખંડિતતામાં,

આપણા ગુંથાયેલા હાથ વચ્ચેથી ઘૂઘવતી નિર્જનતામાં,

મારા જ બે દૃષ્ટિક્ષેપ વચ્ચેની અગાધ અપરિચિતતામાં;

વિસ્મૃતિના હળાહળને તળિયે ફુગાઈ ઊઠીને

હું તરી નીકળું છું.

hun duubun chhun