રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
હવે એ બારણું બંધ કરવું જોઈએ
hwe e baranun bandh karawun joie
મણિલાલ દેસાઈ
મણિલાલ દેસાઈ
હવે એ બારણું બંધ કરવું જોઈએ.
સમુદ્રને એની જ ખારાશથી બોદાશ લાગે,
ચંદ્રની સપાટીનો ચળકાટ ઝાંખો પડે,
સૂર્ય પર ઝાંખાં ઝાંખાં પડો બાઝી જાય,
તે પહેલાં
મારે આ બારણું બંધ કરવું જોઈએ.
સ્વપ્ન હતું :
એની અંદરના એકાન્તને નિખિલમાં વેરી દેવાનું;
એની અંદર ગળું દાબી બેસી રહેલા હાસ્યને
કોયલને ગળે બાંધી વસંતમાં રમતું મૂકવાનું.
પણ
બારસાખે લટકતાં ચોકિયાત ફૂલોની બેધારી નજર
હવે ચૂકે એમ લાગતું નથી.
એ બારણું બંધ થવું જ જોઈએ.
નહીં તો
રાતે વેદનાને દોરડે લટકતું મારું શબ
રોજ સવારે તમારે જોવુ પડશે.
નિખિલ : સમગ્ર. સમસ્ત.
સ્રોત
- પુસ્તક : રાનેરી (પૃષ્ઠ ક્રમાંક 31)
- સર્જક : મણિલાલ દેસાઈ
- પ્રકાશક : ગૂર્જર ગ્રંથરત્ન કાર્યાલય
- વર્ષ : 1987
- આવૃત્તિ : 2