રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

ટાંકી

ઉદયન ઠક્કર

ટાંકી

ઉદયન ઠક્કર

Roman

સહેજ મોટી હતે તો સેલ્લારા લેતે મગરમચ્છ

સહેજ નાની હતે

તો મોઢે માંડત

*

સંભળાય

પેલી તરફ

પાણીને પડછાયે પલળતાં પારેવાંનું ગુટર્ગું

આ તરફ

પરપોટાની બુડ બુડ

શેવાળનો શ્વાસોચ્છ્વાસ

જળનું હાસ્ય

ખળખળાટ

*

આષાઢમાં

પાણી અને પાણી વચ્ચે

પાતળું પડ પહેરીને ઊભા રહેવું

કેમ ગમતું હશે આને?

*

આ વાદળી હતે

તો નળની નહીં

મોરલાની ચાંપે વરસતી હતે

*

ચકલી ચાંચ ઝબકોળે ટાંકીમાં...

આંદોલાય અચ્છોદ સરોવર

ડોલે દેવદાર

વાયુ વાંસળી વજાડે

ખિસકોલો શીંગ ધરે ફોલીને

ખિસકોલીને

વાદળની છાયા સરે

હેમકૂટ પર્વત પર હળવેકથી

ઇન્દ્રનો રથ ઊતરે

સ્રોત

પુસ્તક : રાવણહથ્થો (પૃષ્ઠ ક્રમાંક 54)
સર્જક : ઉદયન ઠક્કર
પ્રકાશક : આર. આર. શેઠની કંપની
વર્ષ : 2022