રેખ્તા
હિન્દવી
સૂફીનામા
રાજસ્થાની
સ્વેટર
swetar
પન્ના નાયક
પન્ના નાયક
હૂંફ માટે
બે
જુદા જુદા ઊનનું
જુદા જુદા રંગનું
હોંશે હોંશે ખરીદાયેલું
આકર્ષક સ્વેટર.
પણ હવે
પહેરવાની મઝા નથી -એ બંધ બેસતું જ નથી! વાંકુંચૂકું ગળું
ટૂંકી બાંય
ને ઠેકઠેકાણે પડતી ખોળ.વળી, મોટા સોયાથી ગૂંથાયું હશે કે કેમ
એનાં કાણાં એટલાં મોટાં
કે
સૂસવતો પવન છાતીએ વળગે…લેતા તો લેવાઈ ગયું
પણ હવે
ઘેરો લાગતો રંગ
ને
ડિઝાઇન પણ ના પસંદ!
થાય છે -ઊન ખરાબ કર્યા વિના
આખું સ્વેટર ઉકેલી
નવી મનપસંદ ડિઝાઇનમાં
ફરી ગૂંથી શકાય (તો)?
સ્રોત
- પુસ્તક : નિસ્બત (પૃષ્ઠ ક્રમાંક 72)
- પ્રકાશક : મિહિકા પબ્લિકેશન્સ
- વર્ષ : 1984