મેં કવિતા લખવાની શરૂઆત કરી

કપાયેલી પાંખોવાળું કબૂતર

ક્યારનુંય

શેરીમાં ફફડ્યાં કરે છે.

વન્ધ્યાના ગર્ભાશયની

રિક્તતા

શેરીમાં થરક્યાં કરે છે.

શેરીના ખાબોચિયામાં

આજે ફરી

શતસહસ્ર જંતુઓ જન્મ પામ્યાં.

પાંડુ વર્ણનો એક વૃદ્ધ

પશ્ચિમ ભણી ડગ ભરતાં

શેરીની વિષમ ભૂમિમાં

ઠેસ ખાઈને પડી ગયો.

તેમ છતાં

એક પતંગિયું

મારી ખરબચડી કાળી દીવાલો પર

બેઠું ન બેઠું...

અને

મેં કવિતા લખવાની શરૂઆત કરી.

men kavita lakhvani sharuaat kari