રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
બાલમુકુન્દ દવે
તમે રે સુંદરવનના સૂડલા
અમે તો તમ કંઠનો કિલકાર :
અમે રે બહેની ને તમે બંધવા,
મનના મળ્યા તારેતાર!
એક રે ક્યારીમાં દોનોં મ્હોરિયાં.
તમે રે ઘૂઘરિયાળી ઝાંઝરી,
અમે તો એક ઝીણેરો ઝણકાર :
અમે રે બાંધવ તમે બહેનડી.
મનના મળ્યા તારેતાર!
એક રે ક્યારીમાં દોનોં મ્હોરિયાં.
તમે રે છત્તર એમ છાંયડી, ,
અમે ધરીએ તમારો આકાર :
અમે રે બહેની ને તમે બંધવા,
મનના માળ્યા તારેતાર!
એક રે ક્યારીમાં દોનોં મ્હોરિયાં.
તમે રે મીઠેરા જળની વાવડી,
અમે તો એક પથ્થરનો પગથાર :
અમે રે બાંધવ તમે બહેનડી,
મનના મળ્યા તારેતાર!
એક રે ક્યારીમાં દોનોં મ્હોરિયાં.
તમે રે મહિયરગઢના મોરલા,
અમે તો એ ગઢની કિનાર :
અમે રે બહેની ને તમે બંધવા,
મનના મળ્યા તારેતાર
એક રે ક્યારીમાં દોનોં મ્હોરિયાં.
સ્રોત
- પુસ્તક : મઘમઘાટ (પૃષ્ઠ ક્રમાંક 15)
- સંપાદક : કનૈયાલાલ જોશી, કાન્તિ કડિયા
- પ્રકાશક : હાર્દિક પ્રકાશન
- વર્ષ : 1982