ઝાડની ડાળીએ ઝૂલ્યાં

ઝાડની ડાળીએ ઝૂલ્યાં

અમે ઝાડની ડાળીએ ઝૂલ્યાં,

કે ઝાડ જરી લીલું થયું,

અમે તાળી લઈ-દઈ ખીલ્યાં

કે પંખીનું ટોળું થયું...

અમે થોડું ચડ્યાં’ને ઊતર્યાં,

કે ઝરણું દડતું થયું.

અમે નીર નદીનાં ઉછાળ્યાં

કે પાણીને હસવું ચડ્યુ.

અમે કિલકારી કરી-કરી કૂદ્યાં

કે આભને ઝૂકવું પડ્યું,

અમે મૂકીને મનડું નાચ્યાં

કે વાદળું વરસી પડ્યું...

અમે મીઠાંમધુર ગીત ગાયાં,

કે ચંદાને ઊગવું પડ્યું,

અમે એવાં મસ્તીમાં ઝૂમ્યાં,

કે આભલું ઝળહળ્યું.

zadni dalia zuliya