રેખ્તા
હિન્દવી
સૂફીનામા
રાજસ્થાની
હાં રે અમે ગ્યાં’તાં
હો રંગને ઓવારે,
કે તેજને દુવારે,
અનંતને આરે,
કે રંગ રંગ વાદળિયાં!
હાં રે અમે ઊડ્યાં
હો મોરલાને ગાણે,
કે વાયરાને વહાણે,
આશાને સુકાને,
કે રંગ રંગ વાદળિયાં!
હાં રે અમે થંભ્યાં
હો મહેલને મિનારે,
કે પંખીને ઉતારે,
ડુંગરાની ધારે,
કે રંગ રંગ વાદળિયાં!
હાં રે અમે પહોંચ્યાં
હો આભલાને આરે,
કે પૃથ્વીની પાળે,
પાણીને પગથારે,
કે રંગ રંગ વાદળિયાં!
હાં રે અમે નાહ્યાં
હો રંગને ઓવારે,
કે તેજને ફૂવારે,
કુમકુમના ક્યારે,
કે રંગ રંગ વાદળિયાં!
હાં રે અમે પોઢ્યાં
છલકંતી છોળે,
કે દરિયાને હિંડોળે,
ગગનને ગોળે,
કે રંગ રંગ વાદળિયાં!
હાં રે અમે જાગ્યાં
ગુલાલ ભરી ગાલે,
કે ચંદન ભરી ચાલે,
રંગાયાં ગુલાલે,
કે રંગ રંગ વાદળિયાં!
સ્રોત
- પુસ્તક : મઘમઘાટ (પૃષ્ઠ ક્રમાંક 3)
- સંપાદક : કનૈયાલાલ જોશી, કાન્તિ કડિયા
- પ્રકાશક : હાર્દિક પ્રકાશન
- વર્ષ : 1982