રેખ્તા
હિન્દવી
સૂફીનામા
રાજસ્થાની
પતંગીઆને
Patangiaa Ne
ત્રિભુવન ગૌરીશંકર વ્યાસ
ત્રિભુવન ગૌરીશંકર વ્યાસ
દીપક બુઝાવા ન જા, પતંગીઆ
દીપક બુઝાવા ન જા
તેજસનો દ્વેષી ન થા, પતંગીઆ
દીપક બુઝાવા ન જા
જ્યોતિર્ધર પૂર્વજ છે દીપનો દીવાકર
તું તો તિમિરની પ્રજા, પતંગીઆ
દીપક બુઝાવા ન જા.
આંખો અંજાય તો દૂર રહે ઉડતો
એના પ્રકાશમાં ન જા, પતંગીઆ
દીપક બુઝાવા ન જા.
તું તારી પાંખના ઝાંખા ચમકાટથી
અમથો ઉછાંછળો ન થા, પતંગીઆ
દીપક બુઝાવા ન જા.
જ્વાળામાં ઝંપલાઈ શાને તું જીવડા!
જીવનની હારે મજા, પતંગીઆ
દીપક બુઝાવા ન જા.
સ્રોત
- પુસ્તક : શારદા : ફેબ્રુઆરી, 1935 (પૃષ્ઠ ક્રમાંક 922)
- સંપાદક : ગોકુલદાસ દ્વારકાદાસ રાયચુરા
- પ્રકાશક : શારદા કાર્યાલય, વડોદરા