રેખ્તા
હિન્દવી
સૂફીનામા
રાજસ્થાની
ચાંદરણી ગાય
chandarni gay
રમણિક અરાલવાળા
રમણિક અરાલવાળા
ચાંદરણી ગાય મારી ચાંદરણી ગાય,
વહેલી વહેલી વગડે ચરવા જાય;
રૂમઝૂમ રૂમઝૂમ ઝાંઝર થાય,
મધુર મધુર એની ઘંટડી ગાય!
ચાંદરણી ગાય મારી ચાંદરણી ગાય,
જંગલમાં ભમતી ઝીંઝવો ખાય;
ઘૂમતી ઘૂમતી જાય ઝરણાને તીર,
શીતળ ને મીઠાં મીઠાં પછી પીએ નીર!
ચાંદરણી ગાય મારી ચાંદરણી ગાય,
મખમલ જેવી એની ચળકે છે કાય:
વડલે ગોવાળિયાની વાંસલડી વાય,
ચાંદરણી ગાય બેઠી બેઠી ઝોકાં ખાય!
ચાંદરણી ગાય મારી ચાંદરણી ગાય,
સાંજ પડે વહેલી વહેલી ઘરભણી ધાય;
વાછરડી સાથ કેવી કરતી રે ગેલ,
વહાલી વહાલી લાગે એને કોઢિયાની જેલ!
ચાંદરણી ગાય મારી ચાંદરણી ગાય,
તાંબડી લઈને બા દોહવાને જાય;
પ્યાલો ધરીને હું તો ઊભો છું પાસ,
ઉના ઉના દૂધની અંતરમાં આશ!
સ્રોત
- પુસ્તક : બાળગીતો- 2 (પૃષ્ઠ ક્રમાંક 23)
- સંપાદક : સોમાભાઈ ભાવસાર
- પ્રકાશક : સંસ્કાર સાહિત્ય મંદિર
- વર્ષ : 1978
- આવૃત્તિ : પુનર્મુદ્રણ