આ દશા સદગુરુ થકી આવે: ભલા રે આ દશા. ટેક.

ઘાંચીને બાંધીને ફેરવે ઘાણી, જલ અગ્નિ તપાવે, હાં રે હરિ જલo:

ધોબીને જલ વિણ ધોતિયું ધોવે, અન્ન મનુષ્ય ખાવે,

સોનારને સુવર્ણ તાવે : આ દશાo

દેખાય નિત્ય વદનમાંહ્ય દર્પણ, જનનીને પુત્ર ઝુલાવે, હાં કે હરિ જનo:

ગોવાળને ચારવા જાય ગોધો, સાપ ગરુડને ડરાવે,

ઉડૈ બાળકને ઉડાવે : આ દશાo

તંગ ભીડે અસવારને તોરી, ઢોલીને ઢોલ બજાવે, હાં રે હરિ ઢોલીo

પુસ્તક બેસી પુરાણીને વાંચે, ખેડૂતને બીજ વાવે,

બિંદુ માંહ્ય સિંધુ સમાવે : આ દશાo

સંપ કરી શ્વાન કાશીએ ચાલ્યાં, ચોપગને ચાર્ય ચાવે. હાં રે હરિ ચોપo:

સિંહ ડર્યો સસલાતણી શેહમાં, જનની સુતાને ધાવે,

પાપીમાંહ્ય ગંગા ન્હાવે : આ દશાo

આંખ સુણે ને દેખાય કર્ણે, વાયુને વૃક્ષ હલાવે, હાં રે હરિ વાયુo:

કાજીનૂં શીષ હલાલ કરે અજ, ધનુષને તીર ચલાવે,

કુંભારને ચાક ફિરાવે : આ દશાo

પંગુ ગરૂડ સમો પંથ કાપે, મેરુને કીડી ઉઠાવે, હાં રે હરિ મેરુo:

બોબડો વેદ ચારે ચટ બોલે, અભણ ભણ્યાને ભણાવે,

જીભ વિણ ગંધર્વ ગાવે : આ દશાo

અગ્નિને ટાઢ બારે માસ પીડે, ભૂખ્યાને લાંઘણ ભાવે, હાં રે હરિ ભૂખ્યાo:

ચિત્ર ઉઠીને ચિતારાને રંગે, થાળને દેવ ધરાવે,

ઋષિરાજ પત્થર હસાવે : આ દશાo