રેખ્તા
હિન્દવી
સૂફીનામા
રાજસ્થાની
ઝવેરચંદ મેઘાણી
[રાસનો ઢાળ]
સખી! કારતકે કવિતાની ઝડીઓ રે,
જાણે ખખડે ફૂટેલી બંગડીઓ રે,
કવિની પત્ની ફેંકી દેતી ખડીયો;
રઘુપતિ રામ રુદેમાં રે’જો રે.
સખી! માગશરે મોંઘા છે કાગળ રે,
પૈસા ન મળે પ્રકાશક આગળ રે,
તોયે ચલવ્યું છે ધાડેધાકડ. - રઘુપતિ રામ.
સખી! પોષે પસ્તીને તોલે રે,
મારાં પુસ્તકના ભાવ બોલે રે,
બુકસેલરો કાળજાં ઠોલે. - રઘુપતિ રામ.
સખી! માથે પોતા કેરાં પડઘમ રે,
ગજવીશું માસિક કાઢી ધમધમ રે,
જાણું જાહેરખબરોના મર્મ. - રઘુપતિ રામ.
સખી! ફાગણે ફાવટ ના’વી રે,
રૂપાન્તર કે ભાષાન્તરની ચાવી રે
તરજુમાની મોસમ આવી. - રઘુપતિ રામ.
સખી! ચૈતરે ચિત્ર કઢાવો રે,
જેની તેની કને દોડ્યા જાઓ રે,
ભલે એની એ તાણે રેખાઓ. - રઘુપતિ રામ.
સખી! દવ બળે વૈશાખી રે,
પાઠ્યપુસ્તકની રત પાકી રે,
યુનિવર્સિટી કૈંકની કાકી. - રઘુપતિ રામ.
સખી! જેઠે જનાબ બુખારી રે!
દેશો રેડિયો ઉપર વારી રે,
અર્થઘન છે કવિતાઓ મારી. - રઘુપતિ રામ.
સખી! આષાઢમાં અનુવાદો રે,
મૂવા શરદબાબુ, નથી વાંધો રે,
ભાષા-ભાવની ખીચડી રાંધો. - રઘુપતિ રામ.
સખી! શ્રાવણે બાળસાહિત્યે રે,
બાંડી બોબડી ભાષાની ભીંત્યે રે,
ફેંકો લોંદા ફાવે તેવી રીત્યે. - રઘુપતિ રામ.
સખી! ભાદરવે ભય ટળિયા રે,
એઠાજૂઠા અહીંતહીંથી મળિયા રે,
સોશ્યાલિસ્ટ સાહિત્યના ઠળિયા. - રઘુપતિ રામ.
સખી! આસોનાં લક્ષણ કાળાં રે,
આંટા ખાય ઉઘરાણીઓવાળા રે,
કાઢો એક નવી ગ્રંથમાળા. - રઘુપતિ રામ.
સ્રોત
- પુસ્તક : સોના નાવડી (પૃષ્ઠ ક્રમાંક 309)
- સંપાદક : જયંત મેઘાણી
- પ્રકાશક : ગુજરાત સાહિત્ય અકાદમી
- વર્ષ : 1997