મારું માણકડું રિસાયું રે શામળિયા

તારા મનમાં એ શું આવ્યું રે શામળિયા;

હું અપરાધણ માતાને મૂકી શા માટે ઝંપાવ્યું રે

શામળિયા – મા…

કાલિંદીનું કાળું પાણી, માંહે વસે કાળો કાળી;

હવે આશા તે શી મળવાની, કેમ આવે વનમાળી રે

શામળિયા – મા…

સંતાનરૂપી મોટું ધન તે, કરમે લીધું લૂંટી;

મેં નવ જાણ્યું જતન કરીને, રતન પડ્યું કેમ છૂટી રે

શામળિયા – મા…

પુત્ર પામી હું છેલ્લે આશ્રમે, ઉછેર્યો પ્રતિપાળી;

નીપનો રસ ઢળી ગયો, હું વિજોગઆગે બાળી રે

શામળિયા – મા…

નાકે મોતી પાયે ઘૂઘરી, મોર મુગટ શિર ધારી;

ફરી રૂપ હું ક્યાંથી દેખું, હરિ આવે ગૌ ચારી રે

શામળિયા – મા…

કાને કુંડળ મુખમાં મોરલી, સાંજે ગોકુળ આવે;

ભૂખ્યો છૌં કહી પેટ દેખાડે, મા કહી મુને બોલાવે રે

શામળિયા – મા..

પીત પિછોડી કાછ કછે, મુજ કને નેતરું માગે;

હું ઘરડી માને થાકી જાણી, કોણ વલોવવા લાગે રે

શામળિયા – મા…

તું પ્રાણેશ્વર તું ગોપેશ્વર, ગોપી દેહ કેમ ધરશે;

બાળસખાની કોણ વલે, આ ગાયો હીસીહીસી મરશે રે

શામળિયા – મા…

ઊંડા જળમાં વાસો કીધો, પાણીમાં કેમ ગમશે;

મોર પોપટ પૂતળી તારે, રમકડે કોણ રમશે રે

શામળિયા – મા…

કાંઈ તું ગયો ને હું જીવું છું, ઓછા સગપણ માટે;

સાચું વહાલ તો તાંહાં જણાએ, સાંભળતાં હૈડું ફાટે રે

શામળિયા – મા…

કાષ્ટપે પાષાણ કઠણ છે, તેપેં કઠણ છે લોઢું;

વજ્રતુલ્ય છે કાળજ મારું, લોકોને શું દેખાડું મોઢું રે

શામળિયા – મા…

તેં મખાંતર દડાનું કીધું, મનમાં દુઃખ કાંઈ આવ્યું;

ઊખળનું બંધન આજ સાંભર્યું, તે માટે ઝંપાવ્યું રે

શામળિયા – મા…

નંદ જશોદા ગાય ગોવાળા, વ્યાકુળ વ્રજની નારી;

ચાર ઘડી પૂંઠે સર્વે પડજો, હળધર રાખે વાળી રે

શામળિયા – મા…