રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

વિશ્વમાનવી

ઉમાશંકર જોશી

વિશ્વમાનવી

ઉમાશંકર જોશી

Roman

કીકી કરું બે નભતારલીની

ને મીટમાં માપું દિગંતરાલને,

માયા વીંધીને જળવાદળીની

અખંડ દેખું પળમાં ત્રિકાલને.

સન્ધ્યા-ઉષાની સજી પાંખજોડલી

યાત્રી બનું ઊર્ધ્વમુખી અનંતનો;

સ્વર્ગંગમાં ઝૂકવું ચંદ્રહોડલી,

સંગી બનું વા ધૂમકેતુ-પંથનો.

વ્યક્તિત્વનાં બંધન તોડીફોડી

વિશ્વાન્તરે પ્રાણપરાગ પાથરું;

પાંખો પ્રકાશે-તિમિરે ઝબોળી

સ્થળે સ્થળે અંતરપ્રેમ છાવરું.

વ્યક્તિ મટીને બનું વિશ્વમાનવી;

માથે ધરું ધૂળ વસુન્ધરાની.

[વીસાપુર જેલ, ૩૦-૬-૧૯૩૩ (ગંગોત્રી)]

વિશ્વપ્રેમ

સ્રોત

પુસ્તક : શ્રેષ્ઠ ઉમાશંકર (પૃષ્ઠ ક્રમાંક 10)
સંપાદક : નિરંજન ભગત, ચિમનલાલ ત્રિવેદી, ભોળાભાઈ પટેલ
પ્રકાશક : ગૂર્જર ગ્રંથરત્ન કાર્યાલય
વર્ષ : 2005