રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
વિડંબના
wiDambna
લાલજી કાનપરિયા
લાલજી કાનપરિયા
(પૃથ્વી)
અહીં નગરના ગીચોગીચ પથે તમારું કદી
પગેરું લઈ શોધતાય અટવાઈને ભીડમાં
અતીવ તલસી રહું પણ તમે હવે ક્યાં મળો?
લગીર અણસાર ના કદી મળે તમારો મને.
હશે રવિ-શશી તમારી પરસાળમાં ઊગતા
ધરી અવનવાં રૂપો; બધું જ એમ મારાય આ
નિવાસ પર ઊગતું. ગગન એકના ટુકડા -
તળે વસવું તોય ના મળવું; કેવી વિડંબના!
પથો નગરના રહે રઝળતા જ ખાલી હવે,
અહીં સૂરજ, ચંદ્ર, વાદળ: બધુંય વૃથા હવે.
અને વિહગની ટહુક, ફૂલ ખીલવાનો કશો
ન અર્થ: ખરું માત્ર એક પલળી જતી પાંપણો!
કદી નીરખજો તમે ગગનગોખમાં ચંદ્રને;
અગાસીથી મળીશ હું નજરને તમારી ગ્રહી!
સ્રોત
- પુસ્તક : નવા ચંદ્રની કૂંપળ (પૃષ્ઠ ક્રમાંક 102)
- સર્જક : નવા ચંદ્રની કૂંપળ
- પ્રકાશક : પ્રવીણ પ્રકાશન, રાજકોટ
- વર્ષ : 1999