રેખ્તા
હિન્દવી
સૂફીનામા
રાજસ્થાની
પળ સફરની
pal sapharni
સ્નેહરશ્મિ
સ્નેહરશ્મિ
હવે આવી પ્હોંચી પળ સફરની: સાથ ન કશો,
હતું જે કૈં પાસે વીસરી બધું તે છોડી સઘળું
જવાનું ક્યાં તેયે સ્મરણપટમાં આંકી જરી ના,
બધા સંબંધોથી વિમુખ બનવું: સદ્ય પળવું.
હવે ભૂકંપો કે મનુજસરજી ભીષણ વ્યથા
વિસારીને એવું ઘણુંક ઘણું ને ભાવિ ઘટના
અજાણ્યા તારાનાં અદીઠ કિરણો જેવી અકળ
તમા ના તેનીયે કશીય કરવી: વિસ્મૃત થવું.
હવે આવી પહોંચી પળ અગમ તે: શબ્દ વિરમ્યા,
શમ્યા આવેગો સૌ: વિહગ નિજ નીડે ઠરી ગયાં,
ન કો ચિહ્નો કયાંયે: પથ ન નજરે કોઈ પડતા,
સરે દૂરે દૂરે પરિચિત પુરાણી સ્મૃતિ બધી,
અજાણી આવે કો લહર કહીંથી વીંટી વળતી
ન જાણું ક્યાં દોરે સ્થળસમયસીમારહિતમાં!
સ્રોત
- પુસ્તક : સકલ કવિતા (પૃષ્ઠ ક્રમાંક 374)
- સર્જક : સ્નેહરશ્મિ
- પ્રકાશક : વિદ્યાવિહાર પ્રકાશન
- વર્ષ : 1984