રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
ભીતરમાં
bhitarman
મણિલાલ હ. પટેલ
મણિલાલ હ. પટેલ
(શિખરિણી)
તમે ઓઢી પાનેતર પરહર્યાં તે પછીય તો,
ઉનાળા ઊગ્યા ને શિશિર થથરી, મેઘ વરસ્યા!
તમે વેરેલા એ કુમકુમ તણા જંગલ મહીં,
ઊગેલાં કેસૂડાં હજીય વિખરે કંકુ પવને-
ઠરે આવી આંખે, ક્ષિતિજ નીરખે મોભ ઘરનો-
તમે ઓઢ્યો વ્હેળો, જળ વગરની સીમ ડૂસકે
રડે; – કૂવાકાંઠો, ચરણરજ ઝંખે મખમલી.
અને રસ્તે રસ્તે તવ સ્મરણના બાવળ ઊગે.
ઝરૂખે બારીમાં સમય હજી ઊભો પ્રથમનો;
તમારી આંખોનો મદીલ કજરો લૈ લટકતી
છબી, ખૂણેખૂણો સ્મિત નીરખવાને ટળવળે
અને નીચી નાડે સતત રડતું રે' કલુખડું!
તમારી આંખોના અરવ સળગે દીપ ઘરમાં
હજી છાનોછૂપો પરણું તમને હું ભીતરમાં !
સ્રોત
- પુસ્તક : ચૂંટેલી કવિતા : મણિલાલ હ. પટેલ (પૃષ્ઠ ક્રમાંક 5)
- સર્જક : ડૉ. મણિલાલ હ. પટેલ
- પ્રકાશક : ગુજરાતી સાહિત્ય અકાદમી
- વર્ષ : 2020