રેખ્તા
હિન્દવી
સૂફીનામા
રાજસ્થાની
સિસૃક્ષા
sisriksha
વિનોદ જોશી
વિનોદ જોશી
નખ સતત વલૂરે જીર્ણ કંગાળ ભાષા,
પચક ખરજવામાં ખદબદે કારયિત્રી;
ચવડ હવડ સ્વપ્નો લેખિનીથી ઝળુંબી,
શરમ વગર કોરા કાગળે શાહી થૂંકે.
તરત બટકતી બુઠ્ઠી બધી કલ્પનાઓ,
અધવચ હડફેટે આવતી એકધારી;
સ્ખલન જનિત શબ્દો ચીકણો સાવ સુંધી,
લપ લપ જીભડીથી ગોબરા અર્થ ચાટે.
કરવટ લઈ કૂડી વ્યંજના થાય બેઠી,
પલકભર ધુણાવે સામટાં ગાત્ર રાંટાં;
ભરભરભર ભૂક્કો થાય આયાસપૂર્ણ,
ઠરડ મરડ ખાંગા ખોચરા અક્ષરોનો.
શિથિલ પણછ તીણાં તીર તાકી શકે ના,
મિથુનવિવશ ક્રૌંચી ચીસ પાડી શકે ના!
સ્રોત
- પુસ્તક : આપણાં સોનેટ (પૃષ્ઠ ક્રમાંક 173)
- સંપાદક : આપણાં સોનેટ
- પ્રકાશક : આદર્શ પ્રકાશન
- વર્ષ : 2007
- આવૃત્તિ : 5