રેખ્તા
હિન્દવી
સૂફીનામા
રાજસ્થાની
પ્રિયે, ચાલો પાછાં
priye, chaalo paachhaa
ઉશનસ્
ઉશનસ્
પ્રિયે, ચાલો પાછાં પરિચય વિનાનાં પ્રથમ શાં
અજાણ્યાં થૈ જૈએ, પરિચય વિનાની ભીડ મહીં
ભળી જૈએ થોડો અતીત 'અમ' તે મૂકી જ અહીં
પળી જૈએ ભાવિ તરફ ભૂંસી આ સપ્ત પગલી.
તમોને ના ફાવી મુજ પ્રીત, ખરું? તો પડી રહી,
ન ફાવે એ કોને — અશું કશુંક મારી પ્રીત મહીં.
લિયો તો આ ગીતો, સપન, સ્મરણો સૌ પરત લો,
તમારે હાથે આ અધર પરથી ચૂંટી સ્મિત લો,
જરી ના ખેંચાશો — ત્વચ મુજ ભલે લો ઉતરડી,
તમારે તો એવું પરત કશું દેવાનું જ નથી!
સુખી બડ્ભાગી છો પરમ, કશું મારું લીધું નથી!
હતાં તેવાં પાછાં પરિચય વિનાનાં પ્રથમશાં
હવે આવો સામાં મુજ પથ...
નહીં હે પ્રિય, નહીં,
ન આવો; હું ચાહ્યા વગર તમને ન્હૈં શકું રહી.
સ્રોત
- પુસ્તક : સમસ્ત કવિતા (પૃષ્ઠ ક્રમાંક 278)
- સર્જક : ઉશનસ્
- પ્રકાશક : કવિશ્રી ઉશનસ્ અમૃત મહોત્સવ સન્માન સમિતિ
- વર્ષ : 1996