રેખ્તા
હિન્દવી
સૂફીનામા
રાજસ્થાની
પ્રત્યાવર્ત
Pratyavart
વિજય રાજ્યગુરુ
વિજય રાજ્યગુરુ
ધસે ધસમસે પ્રચંડ જળખંડ લ્યો ત્રાટકે
ધડીમ્બ ધબ હૈ પડે,લડથડે, છતાં છાલકે -
ફરી બળ કરી કરી ખડકફાટમાં ઊતરે...
જરી થરકથર્થરી જળ, પછી ઠરે - લાંગરે.
જલૌઘ તજતાં થયું અરવ તે જળે આછરે.
છબાક શમણાં સરે, ગગનમુદ્રણા વિસ્તરે -
સમુલ્લસિત નેત્રમાં. જળ કહે - 'અહીં લેટવું -
અહીં જ વસવું હવે, સમદરે ન પાછા જવું.'
પળેક પળમાં નભે ગરજતાં ચઢે વાદળાં
બથોબથ લડે અઠંગ જણ હાંફળાં-ફાફળાં
સળંગ જળભંગથી હલબલી ધરા ધ્રૂજતી
જતી, પવન-મેઘના પરશથી હતી કમ્પતી !
સમુદ્રજળ બાપડું સડસડાટ કાંઠે ચડે...
ફરી ફિણણતા સમન્દર મહીં ધબાકે પડે.
સ્રોત
- પુસ્તક : નિસ્સંગ સૂર્ય (પૃષ્ઠ ક્રમાંક 64)
- સર્જક : વિજય રાજ્યગુરુ
- પ્રકાશક : રવિ-મંગલ પ્રકાશન
- વર્ષ : 2010