રેખ્તા
હિન્દવી
સૂફીનામા
રાજસ્થાની
તમે આવ્યાં...
Tame Aavya....
ભગવતીકુમાર શર્મા
ભગવતીકુમાર શર્મા
તમે આવ્યાં મારે સદન, અણધાર્યાં રૂમઝૂમ્યાં;
પહેલી વર્ષાની નૂપુર-ઘૂઘરીઓ રણકતી
હતી ત્યારે કંકુ-પગલી નમણી ઉંબર પડી
અને ભીની ભીની મહક મટિયાલી હળુહળુ
વહી આવી; મારા મઘમઘત શ્વાસો પરિમલે,
હતા જે રેતી શા ઉર-ધધખતા ગ્રીષ્મ અનલે.
ઝરૂખે બંધાયાં જલ-શિકરનાં તોરણ રૂડા;
તમે જે રોપીતી જૂઈ ધવલ કેવી થનગને!
નભે વિદ્યુત્લેખા રહી રહી શિરોટાય ઊજળી
તમારાં નેત્રો–શી-તમસ-દ્યુતિનો સંગમ અહો!
ઝૂકી આપ્યું હેઠું ઘનગગન બાહુ પ્રસરતું
ધરાને આશ્લેષી કુસુમિત કરી સાર્થક થવાં.
તમે આવ્યાં-મારા કણકણ વિશે ભાવ-પુલક!
જુઓ, અંકુરાયું નવતૃણ થકી આંગણ પ્રિયે!
સ્રોત
- પુસ્તક : કવિતા - ઑક્ટોમ્બર, 1979 (પૃષ્ઠ ક્રમાંક 13)
- સંપાદક : સુરેશ દલાલ
- પ્રકાશક : જન્મભૂમિ પ્રકાશન, મુંબઈ