રેખ્તા
હિન્દવી
સૂફીનામા
રાજસ્થાની
પારેવડું
parewaDun
પ્રિયકાન્ત મણિયાર
પ્રિયકાન્ત મણિયાર
– ત્યાં રાત્રિમાં અધવચે મુજ ઊંઘ ભાંગી
પારેવડું ગભરુ ઘૂઘવતું છજામાં;
વીતી ગયા દિવસનું હજુ શુંય બાકી?
આ શાન્ત સૌ ક્ષણ વિશે ફરી ઘૂઘવે છે.
કેમે કરી મન થયું ન નિવારવાને
આ રાત્રિના પ્રહરમાં કહીં તે ઉડાડું!
ને બ્હાર તો લહર પોષની શીત ગાજે
બેચેન હું બની રહ્યો, હતું એક ગાજતું
તોયે થતું ગગન-તારક સર્વ ગાજે
‘પારેવડું-રૂપ’ લઈ મુજના છજામાં!
ના છેવટે રહી શક્યો મુજને હું હાથ,
બે હાથની થપકીથી દીધ ત્યાં ઉડાડી.
બીજે છજે લઘુક પાંખ ગઈ બિડાઈ,
નિદ્રાભર્યાં, પણ પછી ચખ ના બિડાયાં.
સ્રોત
- પુસ્તક : આ નભ ઝૂક્યું (પૃષ્ઠ ક્રમાંક 58)
- સર્જક : પ્રિયકાન્ત મણિયાર
- પ્રકાશક : નવભારત સાહિત્ય મંદિર
- વર્ષ : 2000