રેખ્તા
હિન્દવી
સૂફીનામા
રાજસ્થાની
કાલવેગ
Kalveg
ચન્દ્રકાન્ત ટોપીવાળા
ચન્દ્રકાન્ત ટોપીવાળા
(પૃથ્વી)
નહીં જ ગઈકાલનો સૂરજ આજ આ કામનો
નહીં જ ખપનો રહ્યો પૂનમચન્દ્ર, વાસી થયો!
વહ્યો સરસ વાયુ કાલ, વહી આજ તે ક્યાં ગયો?
ખીલ્યાં કુસુમ કાલનાં સકલ વ્યર્થ, આજે નથી!
ગયું બસ ગયું જ છે, ન ખપનું, ગયુ તે ગયું
ગયું જ ગયુંનો બધે બધ અપાર કોલાહલો
ઊઠે, ફરી ગયું, ગયું ગયું ગયું ગયું આ ગયું
ગયું ગયું, કશું ટકે નહીં, ગયું ગયું આ ગયું!
રહેતું નહીં, ના જરાય ટકતું કશું, આ ગયું!
સવેગ ધસતું, ધસે ન ટકતું અરે! આ ગયું!
જતું હજી ભળાય, ત્યાં જ ધસતું કશું ને જતું
જતું જતું, નહીં જરા અટકતું, જતું ઓ જતું!
નજીક કશુંક આવતું, ન ટકતું જરા ને જતું
જતું, જતું, જતું, જતું સકલ ચાલી વેગે જતું!
સ્રોત
- પુસ્તક : કાલવેગ (પૃષ્ઠ ક્રમાંક 41)
- સર્જક : ચન્દ્રકાન્ત ટોપીવાળા
- પ્રકાશક : ઝેન ઓપસ, અમદાવાદ
- વર્ષ : 2024