રેખ્તા
હિન્દવી
સૂફીનામા
રાજસ્થાની
મહા-વડ
mahaa-vad
ઉમાશંકર જોશી
ઉમાશંકર જોશી
જટાજટિલ જીર્ણશીર્ણવપુ ભવ્ય આ ભારત,
મહા-વડ અડોલ, કૈં યુગથપાટ ખાતો ખડો.
હશે થડ કયું, કઈ જ વડવાઈઓ? રાફડા
અઘોર-રવ ફૂંફવે! વિકટદંષ્ટ્ર પ્રાણી કંઈ
પરસ્પર પ્રતિ શું હિંસ્ર ધસતાં? છળી ઠોકતાં
ધરા પર ખરી, હણાય પશુ, રાંક જીવાત કૈં
પિલાય, જનમે-શમે. થર પરે થરો કારમા
ઉધેઈ રચતી રમે સૂકલ મૂળજાળાં ગ્રસી.
તથાપિ ચઢતો અહો કહીંયથી જ ઉર્વીરસ
પ્રફુલ્લ કરી ડાળ ડાળ હસતો કુંપેરો પરે,
વરેણ્ય સવિતા તણાં કિરણભર્ગ આમંત્રતો,
વિહંગકુલ પર્ણપુંજ મહીં જે લપ્યાં તેહને
અનંત નભગુંજતી ઋતઋચાથી ટ્હૌકાવતો.
અખંડ ધૃતિવંત ભારત શ્વસંત આ શાશ્વત.
સ્રોત
- પુસ્તક : ઉમાશંકરનાં શ્રેષ્ઠ કાવ્યો (પૃષ્ઠ ક્રમાંક 22)
- સંપાદક : નિરંજન ભગત, ચિમનલાલ ત્રિવેદી, ભોળાભાઈ પટેલ
- પ્રકાશક : ગૂર્જર ગ્રંથરત્ન કાર્યાલય
- વર્ષ : 2012
- આવૃત્તિ : પુનર્મુદ્રણ