યથાર્થ જ સુપથ્ય એક

યથાર્થ જ સુપથ્ય એક

(આત્માનાં ખંડેર : સૉનેટમાલા)

ન રાવ, ફરિયાદ ના, ફિકર ના, અજંપાય ના,

ન કે પ્રબલ કોઈ સત્ત્વ થકી શક્તિની યાચના.

ન ઘેલી લગનીય વા ગગનચુંબી આદર્શની

ભમાવતી અસત્યચક્ર રચી રમ્ય ભ્રાન્તિ તણાં.

જગે દુરિતલોપની ઉર અશક્ય ના વાંછના,

ન વા ધગશ સૃષ્ટિના સકલ તત્ત્વસંમર્શની;

ડગેડગ વધારતી વજન શૃંખલા કાલની,

દમેદમ પધારતી નિકટ શાશ્વતી યામિની.

ન શાંતિ-ચિતસૌખ્ય-કાજ જગ ડ્હોળવાં મંથને,

ભરી યદિ અશાંતિ ચોગમ સમુલ્લસંતી જ તો.

મને અસુખ ના ક્રમે વિતથ સૌખ્ય જેવાં કઠે;

સુખો ન રુચતાં, યથા સમજ માંહી ઊતર્યાં દુખો.

યથાર્થ જ સુપથ્ય એક, સમજ્યાં જવું શક્ય જે.

અજાણ રમવું કશું! સમજવું રિબાઈય તે.

મુંબઈ, ૯-૯-૧૯૩પ (નિશીથ)

yatharth ja supathya ek