રેખ્તા
હિન્દવી
સૂફીનામા
રાજસ્થાની
અજબ દયિતે!
ajab dayite!
મનસુખલાલ ઝવેરી
મનસુખલાલ ઝવેરી
તમે નો'તાં ત્યારે, નયન મુજ નો'તાં નિરખતાં
કશું યે કલ્યાણી! તમ વિણ બધું નીરસ થતાં;
સુહાગી સૃષ્ટિની સમદ, શિવ, સૌન્દર્યલહરી
નચાવી નેત્રોને મુજ નહિ શકી વા નવ હરી.
તમે, કાં કે, એવાં હૃદય વસિયાં'તાં પ્રિયતમે! પ
ન કે નેત્રે બીજું કંઈ પણ તમારા વિણ રમે.
અને હો છો ત્યારે પણ ન નયનો કાંઇ નિરખે;
બધું, કાં કે, એનું ભવભવનું નિર્વાણ વિરમે
તમારા નેત્રો ને અધર વિકસાવન્ત સ્મિતમાં,
રુપાળી છાતીની ચડઉતર થાતી ધબકમાં, ૧૦
શશી, તારા, પુષ્પો, ધનુ ઘનનું, પ્રત્યૂષ:સહુનાં
વસે જ્યાં સૌન્દર્યોં હસમુખ તમારા વદનમાં.
તમે યે કેવાં છે અજબ દયિતે! કે નયનમાં
અભાવે ને ભાવે પણ મુજ રમી એકજ રહ્યાં!
૧ર ઑક્ટોબર, ૧૯૩૮
સ્રોત
- પુસ્તક : આરાધના (પૃષ્ઠ ક્રમાંક 5)
- પ્રકાશક : આર. આર. શેઠ
- વર્ષ : 1939