બગડેલો દિવસ

બગડેલો દિવસ

સવાર પડતાં ન દાતણ મળ્યું, ચિડાયો જરા,

છતાં તરત વાપર્યા ન કટુ શબ્દના કાંકરા.

કહો, કમનસીબ કેવું! નહિ ચાય સારી મળી,

બીમાર વહુ પીરસી ગઈ દુણાયલી ખીચડી.

છતાંય થઈ વીતરાગ, ઘર બ્હાર હું નીસર્યો,

મળી ન બસ-ટ્રામ, ટેક્સી કરી વ્યર્થ ખર્ચો કર્યો.

ઘરે ક્ષુભિત, સાંજના નહિ જમ્યો સુખે સ્વાદથી,

જલ્યા જ કરતો હતો દિવસની દુઃખી યાદથી.

ગયો દિવસ ઠેરઠેર કંઈ વ્યર્થ કંકાસમાં,

વીતી ગઈ વિચારમાં જ મધરાત નિઃશ્વાસમાં.

અનિદ્ર અકળાઈને તરફડ્યો, ન'તી શુદ્ધિયે.

તહીં જ ગમગીન આ હૃદયને કહ્યું બુદ્ધિએ :

સ્મરે, ફરી ફરી સ્મરે ગત વ્યથા તમી વાત કાં?

ખરાબ દિન તો ગયો, પણ બગાડવી રાત કાં?

bagdelo divas