રેખ્તા
હિન્દવી
સૂફીનામા
રાજસ્થાની
અંધારું
andharun
ચન્દ્રકાન્ત ટોપીવાળા
ચન્દ્રકાન્ત ટોપીવાળા
પ્રવેશ્યું અંધારું પદતલ વીંધી સોય સરીખું
ચઢી ખાલી; થોડી ઝણ ઝણ, પછી ઘૂંટી પ્રસર્યું
નળાઓમાં આવ્યું, સીસું બની ગયું, ઘૂંટણ ચડયું
હવે બે જાંઘોને સજડ કરતું લોહ-ચૂડથી!
પડ્યું ઝાઝા વેગે ઉપર ચઢી આવી ઉદરમાં
ધસારે એનાથી સકલ અવકાશો ધમધમ્યા
બધા આખે આખ્ખા હલબલી ગયા પીઠમણકા
કલેજું ડૂબાડ્યું, યકૃતય ડૂબ્યું, આંતરડું યે!
ચઢ્યું છાતી આવી હૃદય કચડ્યું, ફેફસું ય તે
ગળે આવ્યું ત્યાંથી અસહ બળથી મસ્તકભર્યાં -
ઊંડાં પોલાણોમાં ત્વરિત અથડાયું ધડૂસથી.
ભર્યું મોં બેસ્વાદે ફટ દઈ તૂટ્યા કાનપડદા!
અને અંતે આવ્યું ઉપર ચઢી આંખે, તરત ત્યાં
કડાકો, અંધારું ઊડી ગયું કશા વીજઝટકે!
સ્રોત
- પુસ્તક : ગુજરાતી કવિતાચયન 2009 (પૃષ્ઠ ક્રમાંક 11)
- સંપાદક : રાજેશ પંડ્યા
- પ્રકાશક : ગુજરાતી સાહિત્ય પરિષદ
- વર્ષ : 2012