રેખ્તા
હિન્દવી
સૂફીનામા
રાજસ્થાની
અગ્નિનું આવાહન
agninun awahan
પૂજાલાલ દલવાડી
પૂજાલાલ દલવાડી
(પૃથ્વી)
ગુહાનિહિત આદિ–અગ્નિચિનગારી જાગી ઊઠો!
ઊઠો ભડભડી જ્વલંત નિજ અંગ વિસ્તારતી!
ઊઠો પરમ પાવકો! જડ સમાધિ ત્યાગી ઊઠો,
યુગાંધતમ ઘોર રાત વિલસંત શૂલો વતી
વીંધો, ભસમસાત દુર્ગ તમના કરો રોષમાં,
ચીરી કઠણુ કાળજું મલિન કારમા કાળનું,
અનંત યુગની ક્ષુધા લઈ ચડો મહાકાશમાં;
પ્રતિધ્વનિત થાવ ગાન તહીં મૌનમાં જ્વાળનું.
તું પ્રેર શુભ પ્રેર, વેગભેર પ્રેર, અગ્નિ મને
ક્ષણે વિરમ ના, વિરામ મુજને ય ના દે ક્ષણે.
પ્રચંડ તવ જ્વાળને પ્રતિપળે ઊંચે ને ઊંચે
ઉછાળ, રચી વીજવલ્લરીમયી શિખાની સીડી,
અનંત શિવ ધામમાં અચળ એહને ટેકવી,
મને સતત આપ ઊર્ધ્વ ગતિ, અગ્નિ! તારી ફૂંકે.
સ્રોત
- પુસ્તક : ગુજરાતી ઊર્મિકાવ્યો (પૃષ્ઠ ક્રમાંક 61)
- સંપાદક : જયન્ત પાઠક, રમણલાલ પાઠક
- પ્રકાશક : આદર્શ પ્રકાશન
- વર્ષ : 1983