આભાર

આભાર

અમે તો આકાશો ભણી પીઠ કરી’તી ભીંત ચણી;

અરે, સારું છે કે હજી પણ અમારા ઘર મહીં

ઘણે ઊંડે ઊંડે ઊડતી ઊડતી આવી ભીતરે

ગૂંથે છે માળાઓ કબૂતર, કપોતો, ચકલીઓ;

લઈ આવે થોડું ગગન ઘરમાં એ મિષ વળી;

અમો સૌનાં ઋણી : નભતી ઘરમાં જેથી નભતા;

હજી સારું છે કે શિર પર રસોડે તણખલાં;

ઝીણી ચીંચીં, ટ્હૌકા, મલમલી પીંછાઓ ખરી રહે;

હજીયે આવે છે વનની લીલી ક્હેવા પરીકથા

હવામાં આઘેનું પરણ મનમાં છેક ખરતું;

હજી તો સારું છે : ભીંત-તરડમાં માથું ઊંચકી

વિના પૂછ્યા-ગાછ્યા તૃણ નીકળતું ફુક્ક કરીને;

ભલું કે મિટ્ટીમાં હજી વન તણાં આદિમ મૂળો;

તજી વાડા-છોડે નથી ઊઘડતાં પ્લાસ્ટિક ફૂલો.

aabhar