રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

આભાર

ઉશનસ્

આભાર

ઉશનસ્

અમે તો આકાશો ભણી પીઠ કરી’તી ભીંત ચણી;

અરે, સારું છે કે હજી પણ અમારા ઘર મહીં

ઘણે ઊંડે ઊંડે ઊડતી ઊડતી આવી ભીતરે

ગૂંથે છે માળાઓ કબૂતર, કપોતો, ચકલીઓ;

લઈ આવે થોડું ગગન ઘરમાં એ મિષ વળી;

અમો સૌનાં ઋણી : નભતી ઘરમાં જેથી નભતા;

હજી સારું છે કે શિર પર રસોડે તણખલાં;

ઝીણી ચીંચીં, ટ્હૌકા, મલમલી પીંછાઓ ખરી રહે;

હજીયે આવે છે વનની લીલી ક્હેવા પરીકથા

હવામાં આઘેનું પરણ મનમાં છેક ખરતું;

હજી તો સારું છે : ભીંત-તરડમાં માથું ઊંચકી

વિના પૂછ્યા-ગાછ્યા તૃણ નીકળતું ફુક્ક કરીને;

ભલું કે મિટ્ટીમાં હજી વન તણાં આદિમ મૂળો;

તજી વાડા-છોડે નથી ઊઘડતાં પ્લાસ્ટિક ફૂલો.

સ્રોત

પુસ્તક : કાવ્ય-કોડિયાં (પૃષ્ઠ ક્રમાંક 52)
સંપાદક : નિરંજન ભગત
પ્રકાશક : લોકમિલાપ ટ્રસ્ટ
વર્ષ : 1980