વસ્તીના લોકે, વિપ્ર સાથે પાડ્યો વાંધો;

કહે કોઈ દ્વિજનું કામ ન કરવું, બંધી એવી બાંધોરે. વસ્તીના...

ઘર ઘરથી ભેળા થઈને, સઉ, મુખથી બોલ્યા માળી;

પુષ્પ પત્ર દ્વિજને નહિ દઈએ, અમે ગાંઠ એ વાળીરે. વસ્તીના...

કહે સુતાર અમે કોપ્યા તો, ભોગ ભટોના મળશે;

ઘંટીનો ખીલડો ભાગે તો, દાણા શેણે દળશેરે. વસ્તીના...

ઘાંચી કહે અમે નહિ દઈએ, દીવેલ દીવા સારૂ;

દીવા વિના ઘર દેખાશે જેમ, અપાશરે અંધારૂંરે. વસ્તીના...

દરજી કહે કોઈ દ્વિજને માટે, થીંગડી એક ન માંડો;

કાંચળી વિના ઉકાંચળી ફરશે, રૂષિ સઘળાની રાંડોરે. વસ્તીના...

વણકર કહે છે વસ્ત્ર ન દેવાં, એટલે અડચણ મોટી;

ચકલે ચકલે ચીંથરાં વીણી, છો વાળે લંગોટીરે. વસ્તીના...

કડીઆ કહેછે ઘર પડશે તો, કોણ હવે ચણી દેશે:

હાથે રોડાં ગોઠવશે, એની રાંડ તગારાં વહેશેરે. વસ્તીના...

મોચી કહે અમે કોપ્યા તો, ઉડશે એના આટા;

ખરે બપોરે જવું પડે તો, પગે બાંધશે પાટારે. વસ્તીના...

કહે હજામ હવે બ્રાહ્મણના, કદીએ વાળ ન લેવા;

ડાઢાં વધવાથી દેખાશે, બધાય બકરા જેવારે. વસ્તીના...

કહે લુવાર કરો એવું કે, તરતજ તેઓ થાકે;

લોઢી કે કડછી નહિ દેવી, છો પછી આટો ફાકેરે. વસ્તીના...

કહે ભરવાડ હવે બ્રાહ્મણનાં, નહિ ચારીએ ઢોર;

ભણવું ગણવું ભૂલી ગાયો, ચરાવશે જઈ ગોરરે. વસ્તીના...

કહે કુંભાર ન દેવાં વાસણ, તેથી તરત અકળાશે;

હાથે હાંલ્લાં પડશે તો, બ્રાહ્મણ ઓઝા કહેવાશેરે. વસ્તીના...

ઘર ચણવા માટીના ગુણા, દિધાનિ વાત હવે શી;

માટીખાણે માટી લેવા, જશે ગધેડે બેશીરે. વસ્તીના...

ધોબી કહેછે વસ્ત્ર ન ધોવાં, પછી કકળશે કેવા;

ગોર બધા મેલા ગંધાશે, જતી ઢુંઢિયા જેવારે. વસ્તીના...

કોળી કહે અમે બ્રાહ્મણને, ખૂણે ખાતર દેશું;

ગૌમુખીને આસનીયાં, સુદ્ધાં જઈ ચોરી લેશુંરે. વસ્તીના...

ભાંડ ભવાયા ચારણ ગાંધ્રવ, એ વળી બોલ્યા એવું;

અમે ફજેત ફજેત કરીને, કરશે જોવા જેવું રે. વસ્તીના...