કાનુડે ન જાણી મોરી પીર, બાઈ હું તો બાળકુંવારી

મીરાંબાઈ

કાનુડે ન જાણી મોરી પીર, બાઈ હું તો બાળકુંવારી

મીરાંબાઈ

કાનુડે ન જાણી મોરી પીર, બાઈ હું તો બાળકુંવારી રે,

કાનુડે ન જાણી મોરી પીર.

જલ રે જમના અમે પાણીડાં ગયાં'તાં વહાલા,

કાનુડે ઉડાડ્યાં આછાં નીર, ઊડ્યાં ફરરરરરરર રે. કાનુડે૦

વૃન્દા રે વનમાં વા'લે રાસ રચ્યો છે;

સોળસેં ગોપીનાં તાણ્યાં ચીર; ફાટ્યા ચરરરરરરર રે. કાનુડે૦

હું વેરાગણ કા'ના! તમારા રે નામની રે;

કાનુડે માર્યાં છે અમને તીર; વાગ્યાં અરરરરરરર રે. કાનુડે૦

બાઈ મીરાં કહે પ્રભુ ગિરિધર નાગર,

કાનુડે બાળીને ફેંકી ઊંચે ગિર; રાખ ઊડી ફરરરરરરર રે. કાનુડે૦

સ્રોત

પુસ્તક : મીરાંનાં પદો (પૃષ્ઠ ક્રમાંક 46)
સંપાદક : ભૂપેન્દ્ર બાલકૃષ્ણ ત્રિવેદી
પ્રકાશક : ફાર્બસ ગુજરાતી સભા
વર્ષ : 1986
આવૃત્તિ : ત્રીજી સંવર્ધિત આવૃત્તિ