તૂટ્યો મારો તંબુરાનો તાર

તૂટ્યો મારો તંબુરાનો તાર,

ભજન અધુરૂં રે, રહ્યું ભગવાનનું— તૂટ્યોo

એક તૂટતાં બીજા રે તાર અસાર છે,

જીવાળીમાં નહિં હવે જીવજી;

પારા પડ્યા પોચારે, નખલીયું નામનું—તૂટ્યોo

તરડ પડી છે રે બાત્તલ તુંબડે,

લાગે નહિં ફૂટી જતાં વાર;

ખૂટીનું ખેંચાવું રે, કાંઈ ન કામનું— તૂટ્યોo

રંગ ચડેલો કાચો રે, કહો તે કેમ રહે?

ઘોડી ઘણી પોચી પડી જાય;

ખેલ બગડતાં પાસો રે, ભાન ન તાનનું —તૂટ્યોo

સ્વર મેળવીએ શેમાં રે, તાલ બેતાલ છે,

ઢોલકમાં પણ કાંઈ ન ઢંગ;

બંધ થયું છે બારૂં રે, હરિ રસ પાનનું— તૂટ્યોo

ખરચી હવે ખૂટી રે, બૂટી હવે બીજી નથી,

હર હવે ઝાલા તમે હાથ;

કહું છું કામ ન મારે રે, ધન જન ધામનું—તૂટ્યોo

કેશવ હરિની કરણી રે કોઈ ન જાણી શકે,

વાણી મન પાછાં વળી જાય;

બળ ચાલે નહીં એમાં રે, મહા બળવાનનું—તૂટ્યોo

tutyo maro tamburano tar