તેહ તું, તેહ તું, જેહને જોતો ફરે

(રાગ કેદારો)

તેહ તું, તેહ તું, જેહને જોતો ફરે, આતમ-અનુભવે જો વિચારી;

આતમ-દૃષ્ટે તું આપ સંભાળી જો, શું ભમે? સ્વયમેવ જોને ધારી. તે૦

તાહરા ખેલમાં તું જ ભૂલો પડ્યો, અણછતો જીવપણે જઈને વળગ્યો;

જેનો તું થઈ ફરે તે તારું રૂપ છે, દુગ્ધા ટાળીને ખોળ અળગો. તે૦

અદબદ ખેલ છે, તું તેમનો તેમ છે, આવે ન જાયે, ઘટે ન વાધે;

વસ્તુરૂપ થઈને આ તું જ વિલસી રહ્યો અખિલ બ્રહ્માંડ ને વિશ્વ બાધે. તે૦

આપ-અજ્ઞાનની ઓટમાં આવીને આપ-અભ્યાસ-શું આપે લોભ્યો;

નરસૈંપણું લેઈને તું રમિયો અનુભવે, તાહરા ખેલમાં તું જ શોભ્યો. તે૦

teh tun, teh tun, jehno joto phare